Para aprender há que assumir riscos e na Semente sabemos diferenciar entre o risco e o perigo. Quando elas participam na planificaçom da proposta e da elaboraçom material da mesma nom há risco que pare o processo

A Semente é umha escola inserida na natureza e é assi que a natureza está presente no dia a dia das crianças; para a Semente é igual de  importante o que podemos aprender  fora como o que podemos aprender dentro das salas. Tentamos desenvolver nas crianças a curiosidade polo que acontece na nossa envolvente mas também o respeito e o cuidado das formas de vida que nos rodeiam. Além disso achegamo-nos ao conhecimento científico desde mui cedo promovendo umha aprendizagem significativa e umha grande empatia com o meio ambiente.

A Semente entende a importáncia das artes em todas as suas manifestaçons. Nesse sentido, o teatro assume grande importáncia como ferramenta pedagógica e como contributo para criar uma sociedade mais igualitária, justa, livre e crítica.

Ao longo destes meses começamos a entrar em contacto com o mundo das artes cénicas através de atividades de expressom corporal, movimento e pequenas improvisaçons. Assi, fomos quem de construir juntas umha pequena peça sobre os ofícios tradicionais. O feito de representá-lo perante as demais companheiras foi toda uma experiência, mas o realmente importante foi o processo de construçom: um processo lúdico, cooperativo, criativo, emocional e vivencial capaz de promover uma aprendizagem verdadeiramente significativa.

Este ano estreamos em infantil um espaço que sempre estivo presente, mas que ainda nom tinha um lugar próprio. Começamos a conhecer diferentes materiais, ferramentas e técnicas. A explorá-las e vivenciar todas as suas possibilidades.  Imos aos poucos achegando-nos aos mil jeitos de fazer e conceber a arte e que assi nos permitem expressar-nos. Conhecemos referentes que alimentam o nosso imaginário, e imos fazendo intervençons neste espaço nosso que as vezes é museu, as vezes obradoiro, e sempre lugar de mil aprendizagens.

A Semente é um espaço educativo interativo onde a educadora é umha mediadora que acompanha a criança no seu processo de aprendizagem; a relaçom pedagógica consiste no provimento das condiçons em que educadora e criança podam colaborar para fazerem progredir essas trocas que favorecem o desenvolvimento integral e a aprendizagem mútua.
Deste jeito as crianças procuram informaçom para a elaboraçom dos seus projetos. Desta vez a escolha foi sobre espécies invasoras, protegidas e extintas, percebendo os valores ambientais da nossa terra, observados na nossa envolvente mais próxima e comparando com os de outras partes do mundo.